الحلقة الرابعة عشر
* شفنا أول يوم لمحمد في KG2
ويا سلام ... معجزة المعجزات ... طفل بيجيله استدعاء ولي أمر من أول يوم حضانة
أمال في الابتدائي هيحصل ايه؟... فصل أسبوع مثلاً... المهم محمود كان هيجيله صدمة
عصبية بس الحمد لله ونعيش الموقف...
سلمى : لما رحت أجيب محمد لقيته فرحان خالص
محمود: طب الحمد لله
سلمى : ما أنا كنت فاكرة أنه فرحان عشان حاجة كويسة ...
لكنه فرحان ع.. عش.. عشان...
محمد : أنا مش هاخاف .... الأبلة اللي مش هقولها مس
قالتلي هات بابا المرة الجاية
محمود: يخرب بيتك؟؟ ليه عملت ايه؟
محمد : عيل قالي نلعب استغماية وجالي عشان اغميله عينيه
فكنت هعمله زي ما شفت في التليفزيون وكارتون الكاراتيه وكنت هاحط ايدي في عينه بس
الأبلة شافتني وما خلتناش نلعب
محمود: مخلتكوش تلعبوا ... انت عارف كنت هتعمل ايه؟
محمد : كنت هغمي عينيه عشان ما يشوفناش ونستخبى
محمود: يا لهوي على البراءة ... ده انت كنت هتغمي عينيه
علطول
محمد : مش فاهم ...
محمود: اياكش تكون بتستهبل ... مش هيحصل طيب
محمد : لا والله
محمود: مين اللي علمك تحلف؟؟؟
محمد : يعني ايه أحلف .. أنا سمعت الكلمة دي في
التليفزيون وبعد ما قال لا والله اللي قدامه سكت ...
محمود: خلاص بكره هاروح معاك وأمري إلى الله
* ويعدي بقية اليوم ويجي الصبح ومحمود رايح مع محمد
ووصلوا لحد الحضانة
محمود: يلا يا حبيبي وريني المدرسة
محمد : معرفش اسمها
محمود: طب هي بتدرس لك ايه؟
محمد : كل حاجة
محمود: خلاص ودينا الفصل بتاعك
* وصلوا لحد الفصل ونشوف اللي حصل ...
محمود: السلام عليكم ورحمة الله وبركاته
الفصل كله: وعليكم السلام ورحمة الله وبركاته
محمد : ايه الصوت ده كله كان كفاية الأبلة ترد
محمود: ولد ... اسكت .. معلش حضرتك .. طفل
المدرسة: ده مش طفل ده مشكلة
محمود: مغلبني معاه من ساعة ما جيت بس بجد المشكلة اللي
عملها ما كانش قاصدها وكان بيتصرف زي أي طفل بيقلد حاجة بيشوفها
محمد (في نفسه): والله برئ يا بيه
المدرسة: أنا على فكرة مش قايلة انه يجيب حضرتك عشان
اشتكي منه ... لكن أنا بصراحة طالبة من حضرتك انك تديني فرصة أعلمه ازاي يتعامل مع
غيره من الأطفال ده طبعاً بمساعدة البيت
محمود: طبعاً محمد تحت أمرك .. اعتبريه ابنك ... بس ده
طبعاً لو مش هيتعبك
المدرسة: لأ طبعاً ... بس يارب محمد ما يزهقش مني
محمد : أنا مش هزهق بس خايف لتزهقي انتي
محمود: اسمها حضرتك
محمد : حضرتك
المدرسة: لأ ما تخافش يلا ادخل الفصل
محمد : طيب
محمود: شكراً ليكي ويارب ما يتعبكيش
* وخلاص الحمد لله انفضت المشكلة وهنبدأ يوم جديد في
الفصل مع محمد
المدرسة: النهاردة هنلعب لعبة مع بعض
محمد : احنا هنذاكر ولا نلعب .. عالم فايقة ورايقة على
رأي فرح
المدرسة: ما احنا ممكن من اللعبة يا محمد نكون وكأننا
بنذاكر
الفصل كله: ازاي ...؟
المدرسة (في نفسها): يخرب ده شكله عدى الفصل كله وعملي
انقلاب .. شكله هيستولي على الحكم ...
محمد : يا أبلة ...
المدرسة: طيب بلاش نلعب ... يلا نذاكر ونكتب
محمد : لأ مش عاوز اذاكر ...... هاطلب بحقي في اللعب
المدرسة: طب العب لوحدك وأنا هذاكر لزمايلك
* وبعد شوية زهق وراح يذاكر زي ال.... ولا مؤاخذة ...
لازم أذله شوية
المدرسة: تعالى هنا يا محمد
محمد : نعم
المدرسة: انت زعلت لما لعبت لوحدك؟
محمد : لأ انا زهقت بس
المدرسة: تحب تلعب معايا ؟؟؟
محمد : نلعب استغماية وأغميلك عينك
المدرسة: لأ اغميلك انا عينك
محمد (في نفسه): لأ دي هبلة تخرملي عينيا ... خليها تجرب
محمد : طيب .. بس حاسبي على عينيا وغميهم بشويش
المدرسة: ما تخافش
* وغمت عينه زي البني آدمين بايشارب ... ولعبوا واتبسط
قوي وشكله هيحب الأبلة
وبيسلم عليكم ويشوفكم الحلقة الجايةإن شاء الله 
ليست هناك تعليقات:
إرسال تعليق