الحلقة السابعة
*بعد
ما عدى سبوع محمد على خير والباشا محمد ولا عارف حد خالص ... هنشوف محمود وسلمى مع
محمد وياترى ايه اللي هيحصل
محمود: كان سبوع انما ايه حكاية
سلمى : بجد عجبك يا حودة ... ربنا يخليلي ماما وبابا
محمود: انتي بتعايريني ولا ايه؟؟
سلمى : عيب عليك يا حودة بعد حبنا والأيام اللي قضيناها
سوا تقول كده هو أهلي وأهلك ايه ما الاتنين واحد
محمود: ماشي يا غالباني دايماً بكلامك
* تمر عدة أيام وتبدأ المعاناة بس مش جامد قوي أتاريه
أول الشهر وطبعاً طلبات محمد أوامر بس يا ترى محمود هيستحمل كتير ؟!
محمود: طب يا سلمى أنا نازل الشغل ... عاوزة حاجة وأنا
راجع؟
سلمى : سلمى آه والنبي يا محمود هات لمحمد علبة بامبرز
حجم صغير وكمان هات له سكاتة وشخشيخة عشان ما يبكيش كتير
محمود: طلبات محمد وأم محمد أوامر.. انتي مش عاوزة حاجة
ليكي؟
سلمى : عاوزاك تجيلي بالسلامة وربنا يخليك ليا
محمود: طب سلام ... لا اله إلا الله
سلمى : محمد رسول الله
*يذهب محمود للشغل وسلمى ترعى محمود وتحضر الغدا وعند
عودة محمود
محمود: السلام عليكم ... أنا جيت
سلمى : نورت البيت .. حمد الله على السلامة .. ربنا
يخليك لينا ما نسيتش حاجة وكمان جايب حاجات تاني للبيت
محمود: غمضي عينيكي
سلمى : ليه يا حودة انت هتقلع ومكسوف مني ولا ايه؟
محمود: لأ هنلعب استغماية يا ظريفة .... غمضي وبلاش غلبة
سلمى : وأدي تغميضة .. مش عارفة هنلعب استغماية هنا
ازاي؟
سلمى (في نفسها): أصل انا عارفة محمود موظف على قده
فأحسن اني ما أعشمش نفسي بهدية وأفتكر نفسي في فيلم من الأفلام
محمود: فتحي خلاص
سلمى : ايه خلاص غيرت ولا استخبيت كويس عشان ما امسككش
محمود: افضلي استخفي لغاية ما ادي الهدية للست الغلبانة
اللي تحت البيت
سلمى : بتقول ايه .. هدية ... (يغمى على سلمى)
محمود: فوقي يا بنتي انا قلتلك اتجوزت عليكي ولا حاجة ..
ده أنا جايبلك هدية
سلمى : يبقى عملت عملة .. أمال جبت الفلوس منين ؟ أو
عملت عملة تزعلني ... وعاوز تاكل بعقلي حلاوة
محمود: لأ انت عقلك اتلحس من المسلسلات ... أنا قلت
الغلبانة أولى بالهدية
سلمى : لأ خلاص بس احكيلي بمناسبة ايه الهدية دي؟
محمود: الأول انك وحشتيني جداً .... ثانياً النهاردة أول
الشهر .. ثالثاً عطوني مكافأة في الشغل قلت أجيبلك بيها هدية .... بس شكلي كده غلط
غلطة كبيرة ... ممكن تسامحيني اني جبتلك هدية؟؟؟
سلمى : خلاص يا حودة قلبك أبيض وسماح النوبة ... انت
عارف عقلي صغير
محمود: طب خلاص نرجع الهدية احنا أولى بالفلوس
سلمى : اللي يريحك يا محمود
محمود: تصدقي بايه انك عبيطة
سلمى : الله يسامحك
محمود: خلاص تعالي هنا
* يضم محمود سلمى بين ذراعيه ويطبع قبلة على جبينها
وطبعاً زي رخامة المسلسلات والأفلام لازم حد يبوظ المشهد الرومانسي وأكيد هو محمد
باشا بيعيط
محمد (في اللفة): واااء .. وااااااوااااء .. واء
الترجمة: رايق وفايق وبيحب لي وسايبني مفلوق من العياط
سلمى : خلاص يا محمد خلاص نننه هههههه
محمد (في اللفة): وااا... هييه...غغغغغ
الترجمة: أحسن حاجة اني نكدت عليه .. عاوز يضحك عليها
بهدية عشان تسيبني
محمود: ماشي يا سي محمد ... حتى العيل بيقلد الأفلام
والمسلسلات الرخمة وبيقطع المشهد الرومانسي ... يا خسارة البامبرز والسكاتة اللي
جبتهمله وأحسن حاجة اني نسيت الشخشيخة.
ونكمل
الحلقة الجاية إن شاء الله
ليست هناك تعليقات:
إرسال تعليق