الحلقة التاسعة
*بعد ما شفنا مشكلة شغل سلمى هنشوف اليوم النهاردة هيعدي
ازاي بعد ما سي محمد ما لوش بامبرز وربنا يكون في عون سلمى ويلا نشوف......
محمود: صباح الخير يا سلمى يلا وحياتك تحضري لي الفطار
بسرعة عقبال ما أطلع من الحمام
سلمى : من عنيا بس اصبر ارضع محمد وانيمه وبعد كده افطرك
محمود: ده انا اكون وصلت الشغل قبل ما تنيميه
سلمى : طب وأنا أعمل ايه يا حودة ما انا سهرانة معاه طول
الليل انه ينام مش راضي ويا دوبك ما صدقت اسكته
محمد : وااااااااء...واءواءواء ... ااااء
وااااااااااااااااااء
الترجمة: مش هاسكت بقى .... وهو ما يصبر شوية ولا مش همه
غير بطنه ما فيش مسئولية
سلمى : أهو بكى اهوه وفتح في العياط اسيبه يتفلق واعملك
الفطار ؟؟
محمد : وااااااااااااااااااااااااء ... وااااااااااء ...
واااءواء
الترجمة: يتفلق هوه ما يفطرش انا ما اتفلقش .. خليكي
معايا تكسبي
محمود: وانا اقدر اسيبه يتفلق .. اتفلق انا من عدم
الفطار مش مشكلة ... بس ياريت ارجع الاقي الغدا جاهز ... وانت ياد ارجع الاقيك
نايم ... سلام
محمد : وااهيييييييه .... غغغ..هييه
الترجمة: مشيته من غير فطار وانا مش هنام
...ههههههههههههه
* ويرجع محمود من الشغل هلكان وهو عمال يفكر سلمى طبخت
ايه وبيفكر انه هيروح ياكل علطول ويستريح وينام .. ولكن للأسف ... يفاجئ ان ما فيش
اكل لأن سلمى لسه ما طبختش قال ايه بتغسل غيارات محمد باشا ....
محمود: حضرتك مستنية الطباخ بتاع سعادتك يجي يطبخ يعني
... فهميني
سلمى : ما اديك شايفني يا حودة بغسل غيارات الولد ومن
ساعة ما انت مشيت مش نايم اعمل ايه انا؟؟
محمود: الغيارات تستنى لكن الأكل ما يستناش .. يلا قومي
اغسلي ايدك وابدأي في الاكل يلا بسرعة
سلمى : طيب بالراحة ومن غير زعاق .... أنا آسفة ومش
هتتكرر ... عقبال ما اعمل الأكل خلي بالك من محمد
محمود: سيبهولي ابن اللذينا ده وحياتي لاوريه
محمد : واااااااااااااء...وااءااءاءا ....ايهاهيي
الترجمة: يا ما هياكلني ... عفريت علاء الدين .. الحقوني
محمود(بيلاعب محمد) : ايه ياد محدش قادر عليك ولا ايه
...قول
محمد : هيييييييييييييييه ... ههههههه
الترجمة : لأ ده مش العفريت ده عجوة ما بيأذيش ... وكمان
عمل فيا خدمة قبل كده ههههههههههههه
* مش واخدين بالنا ان سلمى بتكروت الأكل عشان عارفة
محمود لما بيبقى عاوز ياكل وسبحان الله في الانجاز خلص الاكل وهتنده عليه ....
سلمى : يلا يا حودة الأكل
محمود: كويس ان محمد نام ... بس ايه الانجاز ده .. يارب
استر ويطلع الأكل كويس
* يبدأ محمود بالرز وعلى اللي شافه
محمود: انتي ما نقتيش الرز وعديتها وكلت حصويتين لكن
يطلع معجن ده اللي ما اقبلوش ... بس ما علينا بلاها رز خلينا في العيش
سلمى : ما انت ما جبتش عيش يا حودة وعلى العموم العيش
والرز واحد ده فيه حصى والتاني مسامير وان جبته كويس بيبقى عامل زي قرص الفيتامين
محمود: ماشي يا حضرة الدكتورة مفتشة التموين بلاها رز
وعيش ناكل الطبيخ لوحده
سلمى : بالهنا والشفا يا حبيبي
محمود: ايه ده الله يخرب بيتك ده قلقاس ولا خرسانة مسلحة
ده مش بيتاكل ده عاوز شاكوش .. شكلك ما سويتهوش كويس وطالع ني على الآخر .. ايه
نسيتي الطبيخ؟؟
سلمى : معلش عشان عملته بسرعة
محمود: بلاش أكل النهاردة ... بس أول وآخر مرة اللي حصل
النهاردة يا سلمى ... مفهوووووووووووووووم
سلمى : أنا آسفة يا حودة
وبعد
ما محمد بيه بغياراته وبنومه أكل الجو
ومحمود
لا فطر ولا اتغدا
هنشوف ايه اللي يحصل بعدين ونكمل الحلقة الجاية إن شاء الله
ليست هناك تعليقات:
إرسال تعليق