الحلقة الخامسة عشر
* الحلقة اللي فاتت المدرسة تقريباً كسبت جزء صغير من
ثقة وحب محمد وإن كان ده في حد ذاته انجاز .. بس يا ترى هتكمل ؟! وقبل ما نعرف
الجواب نشوف شوية مسائل عائلية....
محمود: ايه أخبارك يا حبيبي في الحضانة مع المدرسة؟
سلمى : واشمعنى بتسأل عن المدرسة؟
محمود: هو عنده غيرها أصلاً أنا شاكك تكون مستنسخة منها
كذا نسخة عشان تكوش ع المدرسة كلها.
سلمى : أيوه كل بعقلي حلاوة
محمد : لأ هي الابلة اللي معرفش اسمها بتدينا كل حاجة
وكمان مخلية بالها مني
* محمد بيحاول يبقى مصلح اجتماعي ولكنه فشل والنتيجة ...
سلمى : طبعاً مخلية بالها منك زي ما بابا مخلي باله منها
محمود: لسه بتغيري عليّ يا سلمى؟
سلمى : مش غيرة بس ...
محمود: اياكي تقولي كرامة ... عشان أنا معرفش أجرح
كرامتك وما يهونش أصلاً أعمل كده
سلمى : ماشي يا حودة
محمود: كانت المدرسة بتقول انها عاوزة تعلمه ازاي يتعامل
مع الأطفال .. ولازم ان احنا نساعدها في كده
محمد : الأطفال حلوين ... الأطفال أحباب الله
محمود: طبعاً سمعتها من التليفزيون
محمد : لأ من ماما لما كانت بتتكلم في التليفون
محمود: انت بتحب زمايلك في الفصل؟؟
محمد : لسه معرفتهمش
محمود: طب ما تحاول تعرفهم
محمد : اصل انا مش هعرف اعرفهم واعرف الأبلة اللي مش
هقولها مس
سلمى : ليه بقى؟
محمد : هيبقوا كتار وكفاية عليّ الأبلة اللي مش هقولها
مس عقبال ما اتعود عليها
*وخلصت المناقشة وما وصلوش لحل في تعامل محمد مع الأطفال
.. وابتدا اليوم التاني
سلمى : اصحى يا محمود
محمود: صباح الخير ... الواد صحي ولا لسه؟
سلمى : ما انا بصحيك عشان كده عمال يقول مش هيصحى الا
لما تصحى انت
محمود: هو الواد ده مولود فوق راسي .. بيعند فيا؟ ادينا
صحينا .. لما اشوفه
محمد : أنا جاهز ولابس بس قلت أرخم ع الصبح
*بعد طقم الرخامة المعتاد راحوا المدرسة
"الحضانة" ... وفي الفصل ..
المدرسة : اذيك يا محمد عامل ايه؟
محمد : كويس
المدرسة : طب مش نقول الحمد لله
محمد : الحمد لله كويس .. حلو كده
المدرسة : حلو قوي .. يلا هنبدا الدرس .. النهاردة هندرس
حساب وهنتعلم حاجة جديدة اسمها الجمع
محمد : وايه هو الجمع
* بيستهبل كالعادة..
المدرسة : الجمع
ده حاجة بسيطة .. بس المهم ان احنا نتعلم الصبر
محمد : احنا هنتعلم الصبر ولا الجمع ؟
المدرسة : هنتعلم الاتنين .. يعني الصبر مثلاً اني استنى
الكبير لما يخلص كلامه كله وبعد كده أساله
محمد : ازاي؟
المدرسة : يعني لما كنت بقول هنتعلم حساب وهنتعلم جمع ..
المفروض انك تصبر لحد ما اخلص كلامي وان ما قلتش كل حاجة ابقى اسأل
محمد : يعني
انتي كنتي هتقولي كل حاجة عن الجمع؟
المدرسة : آه طبعاً .. ممكن بقى تصبر شوية وتبطل أسئلة
لحد ما نشرح يعني ايه جمع
محمد : حاضر يا أبلة
*هنسيب محمد شوية ... ونشوف ايه اللي حصل مع محمود في
الشغل .. يغمى على محمود في الشغل ويضطر زملاؤه في العمل إلى نقله إلى المنزل
للراحة
سلمى : خير يا جماعة .. عايزين مين؟؟
ايه ده
... "محمود" مالك يا حبيبي؟؟؟
زميل : أستاذ محمود أغمى عليه مش عارفين ليه .. وللاسف
معندناش في الشغل دكتور كان طمنا .. فقلنا نجيبه البيت عشان يرتاح .. يمكن يكون
ارهاق
سلمى : شكراً ليكوا يا أساتذة ما نجيلكوش في حاجة وحشة
*بعد مغادرة زملاؤه
سلمى : كده تخضيني عليك يا حودة .. انت مش عارف ان لو
جريتلك حاجة لا قدر الله .. هاموت وراك
محمود: ونسيب الواد لمين؟؟ ... هههههههه ... بعد الشر
عليكي يا عمري .. تلاقيهم شوية ارهاق وهيروحوا لحالهم .. بس لو أعرف انك بتحبيني
كل ده لاتعب كل يوم
سلمى : بعيد الشر .. ويعني مش عارف بعد العشرة والعمر ده
اني بحبك ولا لأ...
محمود: يخرب ... نسيت الولد!
سلمى : ياه نسيناه خالص
محمود: هاروح أجيبه بسرعة
سلمى : وانت تعبان كده
*يرن جرس الباب وتفتح سلمى
سلمى : ايه ده محمد حبيبي .. مين جابك؟؟
محمد : عم عبده بواب المدرسة .. ربنا يخليه .. روحني مش
زيكوا نسيتوني
سلمى : طب وهو فين عشان نشكره
محمد : مشي علطول ... وانا شكرته خلاص
والباشا
كان فين وسايبني ملطوع مستني؟؟
سلمى : عيب يا محمد ده بابا تعبان
محمد : تعبان "بفزع" .. هو فين
سلمى : في الاوضة
محمد : ايه يا سي بابا .. تعبان وسايبني في المدرسة
لوحدي
محمود: معلش يا حبيبي غصب عني
محمد : يا سيدي ولا يهمك .. بس ما تتعودش
سلمى : ربنا يخلينا لبعض ويخليك لينا يا حودة
استنوها الحلقة الجاية إن شاء الله
ليست هناك تعليقات:
إرسال تعليق