الحلقة العشرون
* الحمد لله ربنا رحم محمود وخلص المصيف على خير ومحمود
نجا بجزء من الحديدة بما يكفي لكي لا يعود لأكل الطوب باقي الشهر ... هذا ما ظنه
ذلك الموظف المأسوف على مرتبه وشبابه وحديدته وغطا بيره ... ولكن تأتي الرياح بما
لا تشتهي السفن .. فبعد العودة للمنزل وقبل أن يريح جسمه .......
سلمى : كل سنة وانت طيب يا حودة
محمود: عيد ميلادي جه وانا مش عارف؟؟؟ .. بس انا عيد
ميلادي في 10 واحنا في شهر 4 ... يبقى عيد تحرير سينا
سلمى : لا يا حودة
محمود: طب عيد ميلادك .. وبتقوليلي كل سنة وانت طيب عشان
تحسسيني بالذنب .. انسي مش هاجيب هدية .... ثم ان عيد ميلادك ما يتنسيش ده زي
اليوم اللي الأهلي دك الزمالك فيه ستة ... يعني مش النهاردة
سلمى : لا مش عيد ميلادي ولا عيد ميلاد محمد
محمود: بتقوليلي بعد شهر 3 عشان عيد الأم واجيب هدية
لحماتي .. حاولت وما رضيتش
سلمى : لأ برضه وشكراً يا سيدي
* دي طبيعة الحوار كل واحد بيطلع عين التاني هي في
دماغها حاجة وهو في حاجة تاني خالص ... يارب الستات تغير الطريقة دي
محمود: قولي وخلاص
سلمى : رمضان بعد 4 أيام ...
محمود: وانتي طيبة يا وش السعد .. وادي الحديدة ضاعت ..
ألحق اجيب واحدة من أبو عز قبل ما يغلى تاني
سلمى : حديدة ايه؟؟؟
محمود: يا ستي سيبك ... ادي اللي معايا من الفلوس هاتي
بيها اللي عايزاه ... وادعي يبقضوني بدري ويلا جهزي الطوب من دلوقتي
سلمى : من عينيا ... ربنا يخليك لينا يا حودة
* طبعاً عمالين تسألوا هما بياكلوا طوب بجد ... يا
اخوانا الطوب ده هو ما يتمثل في الباقي من الأكل اللي كانوا بيتدلعوا فيه طول
الشهر .. مفيش مانع عيش ناشف زيادة على ما فيه من عبر ... ساندوتشات ميه ساقعة
(بتنفع) ... اعانات من كل الجهات المعنية من الست الوالدة والست حماته .. واللي
بتتمثل برضه في طوب بس على نطاق أوسع .. ممكن يكون عدس على اعتبار ان ليهم كتير ما
اكلهوش مع انه لسه واكلينه من يومين .. أو فول على اعتبار ان الفول غلي وان خلص
الفول انا مش مسئول ..
أم هند .. ومحدش يقول تاني مين أم هند .. سلمى أخدت
الفلوس واشترت حاجة رمضان وكعادة معظم الستات المصريات .. شالت حاجة للزمن ..
محمود: جبتي حاجات رمضان يا سلمى؟؟
سلمى : الحمد
لله يا حودة وربنا ستر عرفت اظبط الامور بالعافية
محمود: طب الحمد لله .. تعيشي وتجيبي كل سنة
محمد : بس يا سيدي ما جبتش أي حاجة من حاجات الحلويات
محمود: ليه يا سلمى؟؟
سلمى : قلت لما يبدأ رمضان ان شاء الله
محمد : لما نشوف
* وبدأ رمضان ومعاناة المصاريف والأكل ومحمود حمال ومحمد
بيه عمالين معاه عشان يصوم .. وكان بيصوم بس لحد الظهر بس
محمود: شاطر يا محمد بس بكره نحاول لحد العصر
محمد : حاضر بس أنا مش ببقى جعان ممكن أصوم بس أبقى أشرب
بس
محمود: لأ يا حبيبي ما ينفعش لأن الصيام بيعلمنا الصبر
وعشان يحنن قلوبنا على المساكين وازاي بتبقى قدامهم الحاجة بس محرومين منها ..
محمد : بس ببقى عطشان مش بقدر
محمود: كل ما تحس انك عطشان حط ايدك على بطنك وافضل حسس عليها
وانت مش هتعطش
محمد: طيب
* وبعيد عنكم بعد ما قاله طول النهار محمد ماشي في البيت
يحسس على بطنه ويقول عطشان ... لحد العصر وفي الآخر فطر
محمود: برافو يا محمد .. بكره ان شاء الله لحد المغرب ..
وأنا مبسوط منك عشان بتصوم وتصلي وبتسمع الكلام
محمد : حاضر
* وبعد ما عدى 10 أيام على رمضان جت سلمى تقول لمحمود...
سلمى : كل سنة وانت طيب يا حودة
محمود: ايه تاني ما احنا في رمضان
سلمى : لبس العيد يا حودة
محمود: وانتي طيبة يا قمر ... تصدقي بايه انتي فيكي حاجة
لله .. لسه النهاردة صارفين لي في الشغل علاوة استثنائية وما كنتش عارف السبب ..
ولكن اذا عرف السبب بطل العجب .. وربك لما يريد
سلمى : قلب حودة بيسلم
محمود: هي مش كانت قلب العاصي .. ما عليكي
سلمى : هي مش كانت ما علينا
محمود: غيري .. ده انتي قديمة قوي .. بطلوها
* وتشتري اللبس لمحمد واكيد ليها وتجيب لمحمود قميص تحفة
.. عشان بتحضر للصدمة اللي جاية
محمود: ربنا يخليكي ليا يا سلمى
سلمى : ويخليك لينا يا حودة .. كله من خيرك يا حبيبي
محمود: أبوس ايدك بلاش صدمات تانية لسه ما فقتش من رمضان
ولبس العيد
سلمى : لأ هي مش صدمة .. هي عادة .. عاوزة فلوس عشان
أخبز الكحك والعجوة والبسكوت .. وكمان تسيبني يومين عند ماما عشان نساعد بعض
محمود: وماله يا حبيبتي وبتقولي مش صدمة .. صح دول
صدمتين .. يلا خدي يا حبيبتي الفلوس اللي عايزاها واتفضلي يا قمر روحي عند ماما
وخدي معاكي محمد بالمرة .. وياريت لما ترجعي تاني ما تكونيش محضرة أي صدمات .. كل
سنة وانتي طيبة يا قمر
سلمى : ايه الحنية دي المرة دي .. ده كل سنة بتطلع عيني
محمود: مش عارف والله .. يمكن تكون آخر سنة .. وربنا
يختارني السنة الجاية
سلمى : حرام عليك يا حودة .. ليه السيرة دي
محمود: يا ستي بهرج معاكي .. والمرة دي قلت بلاش خليها
فرحانة بالعيد
* وراحت عند مامتها وخبزت ورجعت بعد يومين .. وبالفعل زي
ما تقولوا بتحب تطلع روح محمود .. كانت محضرة له آخر صدمة ...
سلمى : وحشتني يا حودة يا حبيبي
محمود: وانتي أكتر .. يلا اديني الصدمة
سلمى : مش صدمة برضه يا حودة .. ده لبس المدرسة لمحمد
والكشاكيل والكراسات ومصاريف المدرسة
محمود: ياقوت ودهب ومرجان ... أحمدك يارب
سلمى : خير يا حودة
محمود: لأ مفيش الحمد لله اني شايل فلوس على جنب ..
وعامل حسابي
عاوز
أوصيكي على محمد يا سلمى .. ولو حصلي حاجة تخلي بالك منه
سلمى : انت ليه بتجيب السيرة دي كتير يا حودة ؟؟
محمود: مفيش بس عاوز اطمن
سلمى : لا يا سيدي اطمن .. يا سلام هيوصيني على ابني
اللي حتة مني .. زي ما هو برضه حتة مني
محمود: وانتي مش حتة مني وبس .. انتي حتة من قلبي
سلمى : بجد يا حودة ؟؟
محمود: وده سؤال ؟
سلمى : ربنا يخليك ليا يارب
محمود: يارب
سلام
ويارب الحلقة تعجبكم واستنوا
الحلقة الجاية إن شاء الله
الحلقة الجاية إن شاء الله
ليست هناك تعليقات:
إرسال تعليق