إعدام ع ما تفرج

بسم الله الرحمن الرحيم
فرحة فرحة فرحة . عملت مدونة . سامع واحد بيقول لي وايه الجديد . فعلاً مش جديد انك تعمل مدونة بس الجديد اني هكتب .. هكتب في ايه دي مشكلتي . ممكن سياسة ما هو اي حد بيعك فيها هتيجي عندي ويقولوا لا . او اكتب قصص او اكتب شعر وممكن اتجنن وانزل مسلسل . المهم هكتب هوري الناس اللي بكتبه واشوف رأي من الناس . ابقى قابلني هو نفس الشخص برضه اللي قال وايه الجديد. ناس ما بتسبش الواحد ياكل عيش
صادف النهاردة وقت ما نويت اني اعمل المدونة ان حكم المتهمين في قضية الاولتراس اتحكم وكانت مفاجأة 21 واحد احيلت اوراقهم الى فضيلة المفتي . مشفتش صور ومشفتش اي حاجة بس يكفي وصف اللي حاضرين الموقف لما يقولك زغروطة من ام شهيد طالعة مخلوطة بالدموع . واب يحضن صورة ابنه ويقوله كان وراك رجالة وقفوا عشان يجيبوا حقك يا بني .
مشهد غير صورة الاولتراس في عيون ناس كتير .. سامع نفس البني آدم الرخم بيقول يا عم فرحان ع ايه ما هو مش حكم نهائي وممكن يطلعوا منها زي القرعة من الضفيرة اقوله عارف يا كئيب بس خلي الناس الغلبانة تفرح خلي الشباب يحسوا انهم عملوا حاجة خلي الناس تسمع مرة الحكم ده . يقول ما هو مفيش قيادات ولا حد من الداخلية اتحكم عليه يا سيدي دورهم جاي .
ربنا يكرم الشباب ويكرم اهالي الشهدا ويصبرهم وينشف دمعتهم اللي ما فارقتهمش .
***********************************